यस्तो छ आन्दोलनको घोषणा गर्दै गठबन्धनले जारी गरेको २ पन्ने विज्ञप्ति

3 years ago/Sunday, April 16th, 2017

काठमाडौं, बैशाख ३– स्थानीय तह निर्वाचनको मुखमा संघीय गठबन्धनले कडा आन्दोलनको घोषणा गरेको छ र घोषित आन्दोलनमा देशभर मसाल जुलुस निकाल्नेदेखि अनिश्चितकालीन नेपाल बन्द गर्नेसम्मका चरणबद्ध कार्यक्रमहरु रहेका छन् ।
गठबन्धनले आइतबार पत्रकार सम्मेलन आयोजना गरी सार्वजनिक गरेको दुई पन्ने विज्ञप्तिमा आफूहरुको मागको सम्बोधन नगरिकन चुनाव गर्न खोजिएको भन्दै आन्दोलनमा जानु परेको उल्लेख गरिएको छ ।
यस्तै गठबन्धनले संघीय संसद् र प्रादेशिक विधायिकाको निर्वाचन नभई स्थानीय चुनाव हुन नसक्ने समेत दाबी गरेको छ ।
पहिल्यै स्थानीय तहको चुनाव गर्न खोजेर संघीय लोकतान्त्रिक प्रणालीको मूल मर्म र आधारमाथि निर्मम प्रहार गर्न खोजिएको समेत गठबन्धनले गम्भीर आरोप लगाएको छ ।
मोर्चाको विज्ञप्तिमा पुरानै संशोधन विधेयकलाईसंशोधन÷परिमार्जन÷पुनर्लेखन गरी मधेशी, आदिवासी जनजाति, थारु, मुस्लिम, दलित लगायत सीमान्तकृत समुदायहरुको मुद्दा सम्बोधन गर्ने र संविधानमा रहेका कमीकमजोरी, त्रुटि र विभेदकारी प्रावधानलाई सुधार गरी सच्याउनु पर्नेमा त्यसो नगरी पुन नयाँ संशोधन विधेयक ल्याइनु सरकारको गम्भीर भूल भएको दाबी गरिएको छ ।

गठबन्धन र मोर्चाले आन्दोलनको कार्यक्रमअनुसार बैशाख २७ देखि अनिश्चितकालिन आमहड्ताल तथा नेपाल बन्दको आह्वान गरेको छ ।

सरकारमाथि दवावको रणनीति : उम्मेद्वारी दर्ता गर्ने दिन मोर्चाको नेपाल बन्द
सो अघि मोर्चा/गठबन्धनले बैशाख ५ गते जिल्ला सदरमुकाम सहितका प्रमुख सहरहरुमा मसाल जुलुस निकाल्ने, बैशाख ७ गते जिल्लाका प्रमुख स्थानमा लाठी तथा सिठी जुलुस निकाल्ने, बैशाख ९ गते जनकपुर उदयपुर, वीरगञ्ज र काभ्रेमा आमसभा गर्ने, बैशाख १० गते विराटनगर, भैरहवा र पाल्पामा आमसभा गर्ने कार्यक्रम तय गरेको छ भने बैशाख ११ र १२ गते पनि देशका विभिन्न स्थानमा आमसभा गर्ने तय गरिएको छ ।
यस्तै बैशाख १३ गते गाउँसहरका मतदान केन्द्रहरुमा लाठी जुलुस प्रदर्शने गर्ने तथा १४ गते जिल्ला सदरमुकाम लगायतका स्थानमा मसाल जुलुस निकाल्ने तय गरिएको छ ।

यस्तै बैशाख १५ गते थारुहट बन्द, १६ गते नेपाल बन्दको आह्वान गरेको मोर्चाले सो पछि बैशाख २६ गतेसम्मका लागि चरणबद्ध विरोधका कार्यक्रम तय गरिएको छ । २७ गतेपछि भने अनिश्चितकालनि आमहड्ताल तथा नेपाल बन्दको आह्वान गरिएको हो ।

सरकारले बैशाख ३१ को लागि स्थानीय तहको चुनावको मिति तोकेको अवस्थामा मोर्चाले आमहड्तालसहितको आन्दोलनको घोषणा गरेपछि निर्वाचनमा थप चुनौति देखिएको छ ।

हेर्नुस् मोर्चाको २ पन्ने विज्ञप्तिमा के–के छन्
संघीय गठबन्धन
प्रेस विज्ञप्ति
विगतमा भएका जनआन्दोलनहरु खासगरी मधेश जनविद्रोह, आदिवासी जनजाति, थारु आदि आन्दोलनका बखत सरकारसँग भएका सहमति र सम्झौता, अन्तरिम संविधानमा भएको व्यवस्था, संविधानसभामा भएका सहमति, राज्यपुनर्संरचना आयोगले दिएका प्रतिवेदन आदिको मर्म र भावना विपरीत फाष्ट ट्रयाकको नाममा तीन दलका केही नेताहरुद्घारा लोकतान्त्रिक प्रक्रिया र विधिलाई समेत उल्लंघन गरी नेपालको संविधान जबरजस्ती घोषणा गरियो । उक्त संविधानलाई संशोधन÷परिमार्जन÷पुनर्लेखन गरी मधेशी, आदिवासी जनजाति, थारु, मुस्लिम, दलित लगायत सीमान्तकृत समुदायहरुको मुद्दा सम्बोधन गर्ने र संविधानमा रहेका कमीकमजोरी, त्रुटि र विभेदकारी प्रावधानलाई सुधार गरी सच्याउनु पर्नेमा मिति २०७३ चैत्र २९ गते नेपाल सरकारद्घारा व्यवस्थापिका संसदमा प्रस्तुत गरिएको संशोधन विधेयक पनि मधेशी, आदिवासी जनजाति, खस, थारु, मुस्लिम, शिल्पी (दलित), अल्पसंख्यक तथा सीमान्तकृत लगायतका समुदायले उठाएका मागहरु र विगतमा सरकारसँग भएका समझदारी, सहमति र सम्झौताहरु विपरीत हुनुका साथै संयुक्त लोकतान्त्रिक मधेशी मोर्चा र संघीय गठबन्धनले सरकार समक्ष राखेको ११ बुँदे र २६ बुँदे मागहरुलाई समेत बेवास्ता गरी ल्याएको र उक्त संविधान संशोधन विधेयकले हाम्रा राष्ट्रिय मुद्दाहरुलाई सम्बोधन गर्न नसक्ने भएको हुँदा नै मोर्चा÷गठबन्धनले उक्त विधेयकलाई अस्वीकार गरी संघीयता, राष्ट्रिय पहिचान, लोकतन्त्र, गणतन्त्र, समानुपातिक समावेशीकरण लगायत सबैखालका असमानता र विभेद अन्त्य गराउन र विगतमा प्राप्त भएका उपलब्धिहरुको रक्षा गर्नका लागि आन्दोलनमा जान बाध्य भएको छ ।
सरकारले हालै दर्ता गरेको संविधान संशोधन प्रस्ताव अधूरो र त्रुटिपूर्ण मात्र होइन आन्दोलनकारी मोर्चा र गठबन्धनसँग भएको सहमति विपरीत समेत रहेको छ । जनताको कठोर, त्याग, संघर्ष र बलिदानबाट प्राप्त गरेका उपलब्धिहरु खासगरी पहिचान र अधिकारसहितको संघीयता, लोकतान्त्रिक गणतन्त्र, समावेशी समानुपातिक प्रतिनिधित्व, राष्ट्रिय पहिचानको मान्यतालाई समाप्त गरिएको छ । यो संशोधन प्रस्तावमा सहमति विपरीत स्थानीय तहको संरचनालाई प्रादेशिक क्षेत्राधिकार अन्तर्गत नराख्नु, सङ्घीय तहमा बहुभाषिक नीति नअपनाउनु, प्रदेशको भाषा प्रयोगको अधिकारलाई समेत केन्द्रमा बन्ने भाषा आयोगको सिफारिस चाहिने गरी झन् प्रतिगामी संशोधन दर्ता गर्नु, राष्ट्रिय सभाको संरचना गलत एवं विभेदकारी हुनु, सङ्घीय आयोगलाई सङ्घीय संरचना पुनरावलोकन गर्न सक्ने गरी समानुपातिक समावेशी र अधिकार सम्पन्न नबनाउनु, धारा २७४ को संशोधन प्रस्तावले पनि नयाँ प्रदेशको सिर्जना तथा सीमाङ्कन हेरफेरलाई असम्भव बनाउनु, प्रदेश नं ४ र ५ को सीमाङ्कन हेरफेरको प्रस्ताव फिर्ता लिनु, संविधानमा स्वायत्त क्षेत्र, संरक्षित क्षेत्र र विशेष क्षेत्रहरूलाई राज्यको विशेष संरचना÷तहको मान्यता नदिनु, तिनिहरूको क्षेत्राधिकारको अनुसुची संविधानमा नराख्नु, स्वायत्त क्षेत्र, विशेष क्षेत्र र संरक्षित क्षेत्रको सङ्ख्या र सीमा निर्धारण नै नगरी स्थानीय तहको चुनाव घोषणा गर्नु जस्ता गलतकार्यहरु गरिरहेका छन् ।
तसर्थ, यस्ता गलत कार्यहरु तत्काल बन्द गरी संघीय संरचना लगायतका मुद्दाहरु सम्बोधन गरी सर्वप्रथम संघीय संसद् र प्रादेशिक विधायिकाको निर्वाचन गराउनु पर्दछ, अनि मात्र प्रदेश सरकारको मातहत स्वायत्त क्षेत्र, विशेष क्षेत्र र संरक्षित क्षेत्र, गाउँपालिका, नगरपालिकासहित स्थानीय तहको निर्वाचन गरिनु पर्दछ । यही नै संघीय लोकतान्त्रिक प्रणालीको मूल मर्म र आधार हो । अतः जनताको अधिकार प्राप्ति र लोकतान्त्रिक मूल्य र मान्यताको रक्षाका लागि संयुक्त लोकतान्त्रिक मधेशी मोर्चा÷संघीय गठबन्धनले निम्न अनुसारको राष्ट्रिय आन्दोलनका कार्यक्रमहरु घोषणा गर्दछ । घोषित आन्दोलनका उक्त कार्यक्रमहरुलाई सफल पारिदिनु हुन सम्पूर्ण जनसमुदायमा हार्दिक अपील गर्दछौं ।
आन्दोलन सम्बन्धी कार्यक्रमहरु :
१. २०७४ बैशाख ५ गते – जिल्ला सदरमुकाम लगायत प्रमुख स्थानहरुमा मशाल जुलूश
२. २०७४ बैशाख ७ गते – जिल्लाका प्रमुख स्थानमा लाठी÷सिटी जुलूश
३. २०७४ बैशाख ९ गते – जनकपुर, उदयपुर, वीरगंज र काभ्रेमा आमसभा
४. २०७४ बैशाख १० गते – विराटनगर, भैरहवा र पाल्पामा आमसभा
५. २०७४ बैशाख ११ गते – नेपालगञ्ज, विर्तामोड र काठमाडौंमा आमसभा
६. २०७४ बैशाख १२ गते – धनगढी, धरान र पोखरामा आमसभा
७. २०७४ बैशाख १३ गते – गाउँ, शहर र मतदान केन्द्रहरुमा लाठी जुलूश प्रदर्शन
८. २०७४ बैशाख १४ गते – जिल्ला सदरमुकाम लगायत प्रमुख स्थानहरुमा मशाल जुलूश
९. २०७४ बैशाख १५ गते – मधेश÷थरुहट र लिम्बूवान बन्द
१०.२०७४ बैशाख १६ गते – नेपाल बन्द
११. २०७४ बैशाख १९ गते – मतदान केन्द्रहरुमा लाठी जुलूश प्रदर्शन
१२. २०७४ बैशाख २६ गते – जिल्लाहरुमा मशाल जुलूश प्रदर्शन
१३. २०७४ बैशाख २७ गते देखि आमहड्ताल एवं अनिश्चितकालीन नेपाल बन्द
१४. केन्द्रद्वारा तोकिएको कार्यक्रमका अतिरिक्त जिल्ला स्तरीय संयुक्त लोकतान्त्रिक मधेशी मोर्चा÷संघीय गठबन्धनले मतदात केन्द्र स्तरीय संघर्ष समिति गठन गरी संघर्षका कार्यक्रमहरुका साथै स्थानीय स्तरका आन्दोलन सम्बन्धी आ–आफ्ना अन्य कार्यक्रमहरु तय गरी परिचालन गर्ने÷गराउने ।

डा. ओम गुरुङ
प्रवक्ता
२०७४ बैशाख ०३

VIEWS: 2810 पटक हेरीएको
error: Content is protected !!